TRADICIONAL, FOLCLÓRICA OU FOLK?

Usa os teus coñecementos previos!

Ola, rapazada de 6º de Primaria. Como ides...? Espero que moi ben.

Durante o Segundo Trimestre falamos dos conceptos de Música Tradicional, Música Folclórica e Música Folk. Neste post imos refrescar os conceptos.


1. Música Tradicional

• Transmítese oralmente durante xeracións nun lugar xeográfico determinado
• Foi creada cunha función específica: 
• para axudar nos esforzos do traballo; 
• para bailar e, así, poder atopar parella; 
• para acompañar a soidade do pastor; 
• para conmemorar acontecementos históricos...
• A finalidade destas pezas non  é seren interpretadas nun escenario

Este tipo de música existe dende hai miles de anos. Polo tanto, é lóxico pensar que, ó transmitirse de xeito oral, só se fosen conservando aquelas pezas que máis gustaban á xente e que outras moitas desaparecesen por seres de menor calidade. 

2. Recolleita e folclorización

No século XIX diversos estudiosos das cidades achéganse ás aldeas e consideran moi interesantes os cantos e danzas tradicionais que alí escoitan. Para preservalos, deciden facer unha recolleita. É dicir transcribir a papel todo o que escoitan. Segundo avanzan os tempos e a tecnoloxía, estas recolleitas transfórmanse en gravacións de audio e vídeo. 

Unha vez feita esta recolleita, as pezas teñen dous destinos: 

• Formar parte dun cancioneiro
• Ser empregadas polos grupos folclóricos para interpretarse sobre un escenario

Os grupos folclóricos caracterízanse por: 

• intentar ser o máis fieis posibles na interpretación dunha peza;
• adoitan actuar con vestimentas tradicionais;
• tocan exclusivamente instrumentos tradicionais galegos: gaita, zanfonas, requintas, acordión diatónico... e sobre todo, instrumentos de percusión de todo tipo: cunchas, latas de pimentón, legóns, tamboril, tarrañolas, culleres, bombos, pandeiros, pandeiretas...

Entre os músicos folclóricos inclúense: 

• agrupacións de baile; 
• cantareiras;
• cuartetos de gaiteiros;
• charangas;
• zanfonistas; 
• gaiteiros solistas...

3. Música Folk

Na década de 1980 mozos das cidades interesados na música tradicional dan un paso máis e comezan a mesturala con outros estilos musicais, como o rock, a música irlandesa, a medieval... Así comezou un período de mestizaxe musical caracterizado por: 

• incorporar instrumentos tradicionais doutras culturas: 
• bouzouki (Grecia)
• bodhram (Irlanda)
• táboas indias (India)
• incorporar instrumentos doutros estilos musicais: 
• teclados, sintetizadores
• guitarras
• baixos eléctricos
• incorporar ritmos propios doutras culturas e estilos musicais: 
• flamenco;
• salsa;
• reel e giga irlandesas
• ritmos balcánicos...

4. Seguimos o proceso dunha peza 

4.1. Palmira - Florencio, o cego dos Villares (Recolleita: música tradicional)

4.2. Palmira - Leilía (Pandereteiras - música folclórica)




4.3. Palmira - Lulavai (Arpistas - música folk)

Imaxe: CONTANDO ESTRELAS. I Festival Folclórico "Vila de Baiona". En Flikr. CCBYSA